აზერბაიჯანი-საქართველოს საზღვარზე სანიტარული კონტროლი გაუმჯობესდება

19 სექტემბერი 2018

საქართველოსა და აზერბაიჯანის მთავრობებმა, ევროკავშირთან (EU) და გაეროს განვითარების პროგრამასთან (UNDP) თანამშრომლობით, დაასრულეს სამწლიანი ერთობლივი პროექტი, რომელიც წითელი ხიდის საბაჟო გამშვებ პუნქტზე სანიტარული, ვეტერინარული და ფიტოსანიტარული კონტროლის სტანდარტების ამაღლებას ემსახურებოდა.

პროექტის შემაჯამებელი კონფერენცია თბილისში 2018 წლის 14 სექტემბერს გაიმართა. კონფერენციის დასრულების შემდეგ საქართველოსა და აზერბაიჯანის საზღვრის მართვის უწყებების, ევროკავშირისა (EU) და გაეროს განვითარების პროგრამის (UNDP) წარმომადგენლები წითელ ხიდზე გაემგზავრნენ და საზღვრის ორივე მხარეს სანიტარული, ვეტერინარული და ფიტოსანიტარული კონტროლისათვის განკუთვნილი ახალი ინფრასტრუქტურა დაათვალიერეს - სასაზღვრო ინსპექციის სრულად აღჭურვილი პუნქტი საქართველოს მხარეს და ახალი საბაჟო ტერმინალი აზერბაიჯანის მხარეს.

საზღვრის საქართველოს მხარეს ღონისძიებას საქართველოს ფინანსთა მინისტრმა, ივანე მაჭავარიანმა, უმასპინძლა. ღონისძიებაში მონაწილეობა მიიღეს ჯავად გასიმოვმა - აზერბაიჯანის საბაჟოს სახელმწიფო კომიტეტის თავმჯდომარის მოადგილემ, კესტუტის იანკაუსკასმა - ევროკავშირის ელჩმა აზერბაიჯანში, ვინსენტ რეიმ - საქართველოში ევროკავშირის წარმომადგენლობის თანამშრომლობისა და დახმარების პროგრამების განყოფილების ხელმძღვანელმა, ნილს სკოტმა - გაეროს განვითარების პროგრამის (UNDP) ხელმძღვანელმა საქართველოში, გულამ ისჰაგზაიმ - გაეროს განვითარების პროგრამის (UNDP) ხელმძღვანელმა აზერბაიჯანში, მიხეილ დუნდუამ - საქართველოს შემოსავლების სამსახურის უფროსმა, და ტარიელ ჭულუხაძემ - საქართველოს ფინანსთა სამინისტროს აკადემიის დირექტორმა.

სტუმრებმა მოინახულეს ახალი სასაზღვრო ინსპექციის პუნქტი, რომელიც 6.5 ათას კვადრატულ მეტრზე მეტ ტერიტორიას იკავებს და სრულადაა აღჭურვილი სანიტარული, ვეტერინარული და ფიტოსანიტარული კონტროლის საწარმოებლად ევროკავშირის სტანდარტების დაცვით.

გარდა ამისა, ევროკავშირისა და UNDP-ის ხელშეწყობით განხორციელდა საქართველოს სასაზღვრო სისტემების შეფასება ევროკავშირის სტანდარტებთან შესაბამისობაზე, შეიქმნა ახალი თანამედროვე სასწავლო სისტემა საზღვრის მართვის უწყებების თანამშრომლებისათვის, ხოლო შემოსავლების სამსახურისა და საბაჟოს 300-ზე მეტმა თანამშრომელმა გაიარა ტრენინგი საბაჟო კონტროლის პროცედურებისა და სურსათის უსაფრთხოების საკითხებში. მსგავსი სამუშაოები ჩატარდა აზერბაიჯანი-საქართველოს საზღვრის აზერბაიჯანის მხარეზეც.    

წითელი ხიდის პროექტი ევროკავშირის აღმოსავლეთ პარტნიორობის ინიციატივის ფარგლებში განხორციელდა. მისი მიზანი იყო ღია და  დაცული საზღვრის პრინციპების დანერგვა, აზერბაიჯანისა და საქართველოს საზღვრის მართვის უწყებების განვითარება, ორ ქვეყანას შორის არსებული თანამშრომლობის გაღრმავება, ვაჭრობისა და გადაადგილების ხელშეწყობა. პროექტის მთლიანმა ღირებულებამ  2.6 მილონი ევრო შეადგინა. აქედან 2,128,000 ევრო ევროკავშირის დაფინანსებაა, ხოლო დანარჩენი თანხა საქართველოსა და აზერბაიჯანის თანაბარი თანამონაწილეობა.  

პროექტი განახორციელა გაეროს განვითარების პროგრამის (UNDP) წარმომადგენლობებმა აზერბაიჯანსა და საქართველოში, ხოლო მისი პარტნიორები იყვნენ საქართველოს ფინანსთა სამინისტროს შემოსავლების სამსახური და აზერბაიჯანის საბაჟოს სახელმწიფო კომიტეტი.  

წყარო: http://www.ge.undp.org

ნახვების რაოდენობა : 1020

სურათები

კომენტარი

მთავარი ამბავი

შინაგან საქმეთა სამინისტრო პერსონალურ მონაცემებს უკანონოდ ამუშავებს
15 ოქტომბერი 2019
საია-მ განცხადებით მიმართა საქართველოს სახელმწიფო ინსპექტორის სამსახურს შინაგან საქმეთა სამინისტროს მიერ პერსონალური მონაცემების უკანონოდ დამუშავების ფაქტზე რეაგირების განხორციელების მოთხოვნით. ადმინ ...
წაიკითხეთ სრულად

წაიკითხეთ სრულად

ბმულები
volunteering
volunteering
ვებ გვერდის შესახებ

ვებგვერდი შეიქმნა აღმოსავლეთ-დასავლეთის მართვის ინსტიტუტის (EWMI) სამოქალაქო საზოგადოების განვითარებისა და მოქალაქეთა ჩართულობის პროექტის (ACCESS) ფარგლებში.

ვებგვერდის შექმნა შესაძლებელი გახდა ამერიკელი ხალხის მხარდაჭერის შედეგად, ამერიკის შეერთებული შტატების საერთაშორისო განვითარების სააგენტოს (USAID) დაფინანსებით. ვებგვერდზე განთავსებულ მასალაზე პასუხისმგებელია სიდა (CiDA) და შესაძლოა არ გამოხატავდეს ამერიკის შეერთებული შტატების საერთაშორისო განვითარების სააგენტოს (USAID), ამერიკის შეერთებული შტატების მთავრობის, ან/და EWMI-ს შეხედულებებს.

ვებ გვერდს ადმინისტრირებას უწევს sida

cso.ge ფუნქციონირებს 2011 წლიდან

საკონტაქტო ინფორმაცია
მისამართი

ქ. რუსთავი, მეგობრობის გამზირი #1

ტელეფონი: (+995 341) 258822 (14)

ფაქსი: (+995 341) 258822

ელ.ფოსტა: contact@cso.ge